Winter De wiend goelt ieskoold is zien raozen hi’j scheuvelt om de bos hoolt jow en mi’j gevangen de blienen wi’k dichte maeken mien hanen vienen kaele toeken evenpies een waarm krummeltien herinnering an aansen in een vergeten tel (de zunne schient) doen wi’j de redens onder jaegen deur de steden belanen vergees weer op dit stee waor as iesmeesters now de waacht holen de dikte meten van mien zorgen li’jte in de midden van de bos is now oons ienig eigen Willem Jan Teijema (Uut: ’Doe gebeurde et’, Berkoop, 2001) Foto: Jaap Elzenaar

As et je te koold is om d'r uut te gaon, mar ie vervelen je daoromme ........ dan hej' d'r misschien wel aorighied an en los dit letterpuzeltien op. Welk mooie Stellingwarver woord kuj' maeken van de letters MAREKOME? Aj' et goeie woord hebben past et mooi op de stippen in de eerste zin...

Ieder jaor bezorgen vri’jwilligers van de Stellingwarver Schrieversronte veul bewoners van zorginstellings en verpleegtehuzen in Stellingwarf en in Wilhelminaoord een prachtige morgen of middag. D'r wodt dan uut een speciaol veur disse aktie saemenstelde veurleesmappe veurlezen in et Stellingwarfs; zo ok op 1 en 2 feberwaori. Lees veerder op http://www.stellingplus.nl. Foto's: Lenus v.d. Broek

Meraokels veul wille hadde et pebliek vri’jdagaovend bi’j et luusteren naor de verhaelen van de Stellingwarver schriever Freddie de Vries. De biebeltheek van Noordwoolde hadde vri’jdagaovend i.s.m. de SSR veur een optreden van him zorgd i.v.m et eupeningsweekaende van KH 2018. Vanwegens de grote anloop trad de schriever twie keer op! Lees meer op http://www.stellingplus.nl/ Foto's: Baukje Krediet

Omreden heur spietig genoeg wat te min meensken anmeld hebben veur de ni'jjaoraovend op 27 jannewaori bi'j de SSR in Berkoop, gaot die aovend NIET DEUR!

De meensken in et dörp bin d’r mit an. Want zomar inienen is heur dörpsgenoot Jan de Bosfluiter verdwenen. Jan, een wat ooldere, rustige man, die aachter in de bos woont, altied lieke opgeruumd is en altied zien deunties fluit… De SSR het veur dit biezundere jaor KH2018 een verhaeleprojekt ontwikkeld. Iederiene kan d’r an mitdoen: et doel is dat d’r in alle dörpen meensken an de slag gaon mit et schrieven van et twiede diel van et verhael over Jan de Bosfluiter. Et begin is d’r al en et verhael kan him in elk Stellingwarfs dörp ofspeulen. Iederiene die mitdot kan zien eigen kreativiteit kwiet in et oplossen van et raodsel rond Jan. Zie veur meer info http://www.stellingplus.nl/

Zaoterdag 27 jannewaori hoolt de Stellingwarver Schrieversronte veur leden en toekomstige leden een ni'jjaoraovend. Die aovend wodt d'r een echte Stellingwarf-kwis holen, mar naost alle hassenschrabberi'je is d'r ok tied veur humoristische veurdrachten van Gosse Spiekhout uut Noordwoolde. Willinge Prinsstraote 10, inloop vanof 19.30 ure, gien intree.

Op vri'jdagaovend 26 jannewaori wo'n overal in de perveensie verhaelen verteld vanwegens et eupeningsweekaende van Kulturele Heufdstad 2018. Freddie de Vries vertelt een tal van zien Stellingwarver verhaelen in de biebeltheek van Noordwoolde. Vanof acht ure, de toegang is vergees. (Foto: Lenus v.d. Broek)

Stellingwarver schrievers kun mitdoen an een Nedersaksische schriefwedstried mit as thema 'Winter'. Et verhael mag uut hooguut 1000 woorden bestaon en moet veur 10 feberwaori digitaal inleverd wezen bi’j et Huus van de Taol: info@huusvandetaol.nl. Zie veerder op http://www.stellingplus.nl (Foto: Sietske Bloemhoff)

Aende en begin Al weer een jaor veurbi’j ontdaon an de iewighied en overal liggen de brokstokken van de tied as brakken van vergaank’likhied waor bloemen tussen bluuien van geloven en dan opni’j weer hopen en vertrouwen op een ni’j begin Lamkje Hof-de Boer (Uut: Van mien kaant bekeken, SSR, Oosterwoolde, 1981)

Intied staot op 'e webstee StellingPlus al weer de 150e foto in de serie 'Stellingwarfs in et wild'. Daorveur zorgde Henk Jager van Berkoop; hi'j maekte de foto mit de naeme 'Jan van Dam's broggien' an 't Voetpad bi'j Spange.