Zum Gedenke an isarn Papa, Opa und ehemalige Wiert vom Brunold, Kurhüs d'Schtaufe und "Undre Wiert" z' Reattebearg: So liebe Lit, jetzd isch as sowit, isar Herrgott hot gmuint es wär an dr Zit, die Wiertsleit langsam ing zum zieh leider moin i doch viel zfrieh! Zerschd d’Sunnewirt vo Petersthal, dr’no d’ Obre Wiert vom Reattebearg es war, und jetzd? .... dr’Gotthard, zletsch im Brunold Wiert. Zum 66ge wäred se jetzd zu viert ... dr’liebe Gott und isre drui Wiert! Dr’ Papa ... gean hodda g’lacht, au i dr’letzschde Zeit, ibr Kloinigkeita hodda si gfreit, wohlwissend hodda gschätzd die letschde zwoi Joahr, weils ja doch id allad so war. Nienedrißg isch ar geboare, a Joahr schbädr hotta a scho sing Brüedr verloare. Doch war dies in sinar junge Zeit, id des oizig Seeleleid! 45, dr’ Krieag hod viel dahingerafft, au dr’Xaver, sing Vatr hotts numma id Huimat gschafft. Dägwies isch dr’Gotthard gseasse am Fenschtr, gwartet auf d’Rückkeahr vom Vatr, ... odr wared’s gar Gschbenschtr? Viel Joahr hotta rescherchiert und gsucht, bis an gfunde hot dean todbringende Ort in dr Danziger Bucht! Anno 50 hot sing Müetr denn d’Karle ghieret, a wietre Hochzit habba gfieret. Das Resultat aus dere Gschicht? Sing Schweschtr Gabi erblickte die Welt im Licht. Bis 65 war denn scho nammas los i dr’ nui Huimat im Berggaschthof Rohremoos. Müatr seid zunam, als as Zit war fir a Leahr: „An guade Boschtbot dätsch du gea!“ Um Gottes Wille niemals niea ... des ka etzd doch gli gar id sie! So hot ma denn entschiede und id long nabeatled Dr’ Gotthard wird Metzgar beim Müller im Städtle. Mit 21 in Zuffehause hot er d’ Moischtr gschafft, drno no a Kochleahr auf dr’Sunnealp gmacht... so war ar seahr guad vorbereitet, dean Weag als Gaschtwirt er beschreitet. ...... Ghiered hotta zwischenei Und 64 nimmd a de erscht Gaschthof ´ im Reateberg vom Engelbräu. Zwoi Fehla sind denn au scho rumglaufe So zieht ma 69 auf Schtaufe. Im Kurhaus det war ar Wiert mit Charme und Schmitz Verschtande hot ar jedan Witz. Mit groaßam Fließ und guatam Gwisse, hot er 25 Joahr det sing Gschäftle gschmisse! Und do a Wiert niea schloaft – nur ruaht, hottar gmuit dr’Brunold dät ihm denn au no guat! Det hot in au sing Leidenschaft bescheert so manch lange Nacht! 66zge hottar kinne ... au vehement, do war ar voll in sinam Element. Detmols hond au diverse Blättla brichtet, dass manchan Schreit dr’ Wiert zwar schlichtet, doch meischtens loddas wietr hoare, und pflegt sing Eckbank mit sim Schnoare. So verging gar manche Schtund, bis d’Schtammtischlar d’Bearg na gund. D’Urlaub isch do au oft z’kurz komma Drum war die Ruah Dir jetzt zum vergonna. Oifach war des Loslong id, so war es doch a schiene Zeit! Zwoi ruhige Joahr mit lieabe Leit, des hod ihn – i woiß es- au no gfreit! „...so sind id trüreg – kascht nuids verhebe ... nuids verschiebe. D’Lit kenned welle was se wend, isar Herrgott hot’s i sina Händ. Drum beated liaber voanazüe: „Gib isam Vatr die eweg Rüeh!“